དག་ཡིག་མཁས་པའི་འབྱུང་གནས་ལས་བརྡ་གསར་རྙིང་གི་སྐོར་བཞུགས་སོ། །

ལྕང་སྐྱ་རོལ་པའི་རྡོ་རྗེ།(༡༧༢༠-༡༧༨༦)

ཐོག་མར་དགེ་བ་ཀླད་ཀྱི་དོན།

དག་ཡིག་མཁས་པའི་འབྱུང་གནས་ཞེས་བྱ་བ་ལས་བརྡ་གསར་རྙིང་གི་སྐོར་བཞུགས་སོ། །

བར་དུ་དགེ་བ་གཞུང་གི་དོན།

གཉིས་པ་ ཐུན་མོང་ལ་མཁོ་བ་བརྡའ་གསར་རྙིང་གི་རྣམ་གཞག་བཤད་པ་ལ། ཀྭ་ནི་ཀྱེ། གག་ནི་གང༌། ཏེ་པོར་ནི་ཤིན་ཏུ། བྷེམ་པ་ནི་སྒོམ་པ། སྐྱོར་སྐྱོར་ནི་ཡང་ཡང༌། ཚ་བ་ནི་དྲོ། བླ་འོག་ནི་སྟེང་འོག རམ་ཕྱིས་ནི་སྣག་བུམ། བླ་སྐྱལ་བ་ནི་མི་ཟད་པ། འཚལ་མ་འཚལ་བ་ནི་ཟས་ཟ་བ། རྩ་ལག་ནི་གཉེན། གཉའ་བོ་ནི་དཔང་པོ། བསྐྱུད་པ་དང་བསྙེལ་བ་ནི་བརྗེད་པ། གྱ་བ་ནི་ཉམས་པ། གྱག་པ་ནི་བརླག་པ། དཔུང་པོ་ནི་ཕུང་པོ། ཞིག་གུ་ནི་སྨོན་པ། ཡེ་འབྱམས་ནི་སྟོང་ཉིད། དབལ་ནི་ཏོག་སོགས། ངོ་ག་ནི་སྣང་ངོར། གམ་ཡོ་ནི་ཉེ་འཁོར། དམུས་བྱུང་ནི་ཚི་ཆད་དམ་ཡི་ཆད། ཐེན་ཁྱེར་ནི་ཅ་རེ། ག་ཞ་ནི་བཞད་གད། ཡ་ལད་ནི་གོ་ཆ། གནའ་མ་ནི་ཐོག་མའམ་སྔོན། ཅོག་ནི་ཀུན། ཕྱི་མོ་ནི་རྩ་བ། སྦྲེབས་པ་ནི་སྐེམ་པ། སྤྱིའུར་ནི་བྱི་བོ། རོད་པ་ནི་རྣམ་པ། འོ་ཅོག་ནི་མ་ལུས། མདུང་ངོར་ནི་རྒྱན་འགྱེད། ཆམ་དུ་མི་སྐྱེར་བ་ནི་གཏན་དུ་མ་སྐྱེས་པ། རྒྱོལ་བ་ནི་རྒོལ་བ། ནོད་པ་ནི་བཞག་པ། ཁུ་བ་ནི་འཆགས་པ། ཐ་ཚིག་ནི་རྩ་བ་འམ་ཚིག་གི་དོན། བསྟི་པ་ནི་ངལ་གསོ། བརྣག་པ་ནི་བསམ་པ། བརྣབ་པ་ནི་འདོད་པ། བཏུང་བ་ནི་སྤྱོད་པ། སྨྱང་བ་ནི་བརྐྱང་བ། ནམ་ཞར་ནི་ནམ་ཡང༌། གཞུར་ནི་གཞུང༌། འོན་ཏང་ནི་འོན་ཀྱང༌། དབྲག་ནི་བར། ཕྱམ་ཕྱད་དམ་ཆམ་ཆད་ནི་མཉམ་ཉིད། འཛར་བ་ནི་མཛའ་བ། རྨ་ག་ཆད་ནི་ཡང་དག བསྟར་བ་ནི་བྱི་དོར་རམ་གཟབ་པ་སོགས།

བཞབ་པ་ནི་འཇམ་པ། གཏིང་ཕྱིན་ནི་དཔྱིས་ཕྱིན། བྲོ་ནི་མནའ། ཆང་ཁྱུ་ནི་ཚོགས་པ། སྤ་ལོ་ནི་སྤོབས་པ། ཐ་རམ་ནི་ངན། བརྙང་ནི་འཁྲུ་བ། དབྱེ་ནི་ཐང༌། བསྙིལ་བ་ནི་དོར་བ། གཞག་ཡང་ནི་གཞན་ཡང༌། རྒྱ་ཡིས་བཏབ་པ་ནི་ཐ་མི་དད་པ། འགོ་ནན་ནི་ཐོག་མ། འཇི་བ་ནི་འདོད་པ། མཐོང་ག་ནི་བྲང༌། ལག་པ་བསྙལ་བ་ནི་ལག་པ་བཀྲུས་པ། གླམ་པ་ནི་སྣམ་བུ་འཐུག་པོ། ཁྲ་ཁྲོ་ཅན་ནི་སྤྲོ་ཐུང་བ། རུང་ཁུས་ཟ་བ་ནི་གཏུམ་པ། ཇེ་ནི་དང་པོའམ་རེ་ཞིག་ལའང་འཇུག གཞི་བོ་ནི་གཞི་མ། ཇི་འོས་ནི་འཚམ་པ༑ གནོང་བ་ནི་ཉེས་པ། མི་བཀུར་བ་ནི་ཁས་མི་ལེན་པ། གཟོན་པ་ནི་མི་ཉན་པ། འཆབ་པ་ནི་གསང་བའམ་སྦེད་པ། བཅབས་པ་ནི་སྦས་པ། འཛན་དཀའ་ནི་སྦྱོར་དཀའ། འཁུ་བ་ནི་ཞེ་སྡང་བའམ་ལོག་པ༑ བཅིལ་བ་ནི་བཅོམ་པ། གྱ་ཙོམ་པ་ནི་མ་བརྟགས་པ། རྣ་བླགས་ནི་རྣ་གཏད། ཐ་ཆད་ནི་ངན་པ། ཆ་བ་ནི་སྐེག་པ། གཟན་པ་ནི་གསན་པ། སྩེལ་བ་ནི་སེལ་བ། འཕྱེ་བ་ནི་འགྲོ་བ། སྨྲེང་ཚིག་ནི་གསང་ཚིག སྨྲེང་ནི་སྨྲ་བ། སྨྲེ་བ་ནི་ངན་པར་སྨྲ་བ། རྨས་པ་ནི་དྲིས་པ། མི་འཇབ་པ་ནི་རྩུབ་པ། བླ་མཐང་ནི་སྟོད་སྨད་དམ་ཕྱི་ནང༌། སྟོས་པ་ནི་འབྲིམ་པའམ་སྟེར་བ། བརྟ་པ་ནི་རྒྱས་པར་བྱ་བ། བརྟས་པ་ནི་རྒྱས་པ། ད་ཀོ་ནི་ད་ནི། འདི་ཀོ་ནི་འདི་ནི། བཀོན་པ་ནི་ཁྲོ་བ། ཇི་ག་ནི་བརྟག་པ། ཁྱོ་ཤུག་ནི་བཟའ་ཚོ། གཞོལ་བ་ནི་འབབ་པ། རིང་བ་ནི་རྫུད་པའམ་ངན་པ། ཉིས་ན་ནི་བརྟགས་ནའམ་རྣམ་པ་གཉིས་སུ་ན། ཐ་བ་ནི་རེངས་པའམ་ཉོན་མོངས། མཐར་གྱིས་ནི་རིམ་གྱིས། གཞར་ཡང་ནི་སླར་ཡང་ངམ་ནམ་ཡང༌། བཤོ་བ་ནི་འཁྲིག་པ། གར་ཡང་ནི་གང་ཡང༌། མནོས་པ་ནི་བསམས་པ། རེད་པ་ནི་གྲུབ་པ། གྱ་ནོམ་ནི་ཕུན་སུམ་ཚོགས་པ། མགོ་མཉམ་ནི་དུས་མཉམ། སྡུམ་པ་ནི་ཁང༌པ། པོག་ནི་སྤོས། པོག་པོར་ནི་སྤོས་ཕོར། ཤ་དག་ནི་ཤ་སྟག བཀོལ་བ་ནི་བསྐོས་པ། འཇུད་པ་ནི་འཇུག་པ། རྡུབ་པ་ནི་འདུས་པ། ཚམ་ངམ་ནི་འཇིགས་སྟངས། བབ་ཆོལ་ཕྱར་ཡང་ནི་མ་བསམ་པར་འཕྲིན་ལན། དབུད་ནི་དབུས། སྣམ་ལོགས་ནི་ཟུར་རམ་རྒྱབ། སྣྲེལ་ཞི་ནི་འཕྲེད་དམ་ལོགས་སམ་འཆོལ་བ། ཉོད་པ་ནི་ཟས། རོད་པ་ནི་གོས། ཡེང་ཡེ་ནི་ངེས་པར། བསྟིར་མེད་ནི་མནར་མེད། སྦྲིབས་པ་ནི་ལོགས་པ། བྲུ་ཚ་བ་ནི་བཀྲེས་པ། བས་པ་ནི་ཟད་པའམ་མཐའ་དག་པ། རམ་ཤག་ནི་འབྱོར་བ། མཐའ་གྲུ་ནི་རྒྱ་ཁྱོན། མནབ་རྩལ་ནི་ཁ་ཟས། ཁོས་ནི་འདུན་མ། ཆབ་མི་འཚལ་བ་ནི་ཆུད་མི་ཟ་བ། ཇི་རོབ་ནི་ཇི་ཕྱིར། གཡེར་བོ་ནི་མཁས་པ་འམ་གྲུམས་པ།

བསྐྱུད་པ་ནི་བརྗེད་པ། ཁད་ཀྱི་ནི་དལ་བུ། བྱུར་ནི་མྱ་ངན། གཏུགས་པ་ནི་ཆད་པ། ཡོལ་གོ་ནི་སྣོད། བསྙེ་བ་ནི་འཇིགས་པ། བསྙེམས་པ་ནི་ང་རྒྱལ། ཡུག་པ་ནི་རྐང་བ། སུག་པ་ནི་ལག་པ། རྒྱ་ཅང་ནི་སྐ་རགས། གུར་བུ་ནི་གྲུ་བཞི། གྱི་ན་ནི་དམན་པ། ཁོ་ལག་ནི་མཆུ་ཞེང། བརྟང་བ་ནི་གློ་བུར་བ། མི་ཡོག་པ་ནི་ཁེབས་པ། འུབས་པ་ནི་འདུས་པ། ཁུད་པ་ནི་སྐྱེས་སམ་རྫངས། སླགས་པ་ནི་བཀོད་པ། ཕྱང་ཆད་ནི་ཐག་བཅད། ལ་གོར་ནི་སྐྱེན་པ། མུར་འདུག་ནི་མུ་སྟེགས། ཐལ་བྱུང་ནི་མ་ལུས། ཅོ་འདྲི་ནི་མཐོ་འཚམ། གཞེར་བ་ནི་བསྟེན་པ། ཡེལ་འཕྱོས་ནི་ཟུང་འཇུག འཕྲོད་ནི་ཚོགས་པ། ཕྱ་ལེ་བ་ནི་མཉམ་པ། ཆིབ་པ་ནི་ཁྱབ་པ། ཁོས་པ་ནི་འདུན་པ། ངོ་མཐོན་ནི་ནན་གྱི། མོལ་བ་ནི་གཏམ་མམ་གྲོས། ཚུད་མོ་མཁན་ནི་རྐོས་མཁན། གྱིན་འདས་ནི་རང་བཞིན། གོ་འདུན་ནི་ཚོགས་ཤིང་འདུ་བ། གཞུར་བརྟག་ནི་ཟུར་ཟ་བ། མྱག་ཕྲན་ནི་མདའ། ཉེར་བསྡོགས་ནི་སྟ་གོན་ནམ་སྔོན་འགྲོ། གོར་མ་ཆག་དང་གོར་མ་བཀུམ་པ་ནི་ཐེ་ཚོམ་མེད་པ། གནམ་རུ་ནི་གཞུ། སྦྲུག་པ་ནི་ཟད་པ། བཀར་བཏགས་ནི་ཁྲིམས་བསྒྲགས་པ། ཕུང་ཀྲོལ་ནི་དོན་མེད་པ། ལྷགས་པ་ནི་གཏད་པ། ཕྱར་གཡེང་ནི་རྣམ་གཡེང༌། སྒམ་པ་ནི་ཟབ་པ། བགམ་པ་ནི་ཉམས་སད་པ། མནབས་པ་ནི་གྱོན་པ། རྩེག་ལོག་ནི་ཕྲན་ཚེགས་སམ་སྲེད་ཞེན་ཆེ། ཚར་ཕྱིན་ནི་མཐར་ཕྱིན། གཟས་པ་ནི་བརྡེག་པར་བརྩམས་པ། ཕོན་པོ་ནི་ཚོགས་པ། འཆེལ་བ་ནི་ཞེན་པའམ་འཆད་པ། ཐ་རམས་ནི་གཏམས་པ། ཕྱིས་བུ་ནི་སྣོད། རྩེར་ཕྱིབས་ནི་མཐར་ཕྱིན། གླལ་བ་ནི་ཁ་གདངས་སམ་རྣམ་པར་བསྒྱིངས་པ། ཀྲུབས་པ་ནི་ཕུབ་པའམ་གྱོན་པ། གཡེམ་པ་ནི་འདོད་པ། མུ་ཅོར་ནི་ཁ་ཟེར་བའམ་ཁ་དྲག གནམ་པོ་དྲང་པོ། ཁོར་ཟུག་ནི་ཁོར་ཡུག མ་རེད་པ་ནི་མ་གྲུབ་པ། གོ་འདུན་ནི་གང་མོས། མོང་དུ་ཆུད་པ་ནི་ཁོང་དུ་ཆུད་པ། རླིབས་པ་ནི་རྒྱ་ཆེ་བ། མཆིལ་བ་ནི་ལྕགས་ཀྱུ། འགྱེད་པ་ནི་འགྱོད་པ། འགྱེར་བ་ནི་སྤོང་བ། གེར་མ་ནི་རག་མ། རུམ་པ་ནི་ལྟོ་བའམ་ཕག ཕོམ་པ་ནི་བུམ་པ། རྟོན་པ་ནི་འདོད་པའམ་རྗེས་སུ་འབྲང་བ། འགེམས་པ་ནི་འཇོམས་པ། སྙུགས་སུ་ནི་ཡུན་དུ། དཔྲོག་པ་ནི་འཕྲོག་པ། གླེབས་པ་ནི་མནན་པ། གལ་གྱིས་ནི་ནན་གྱིས་སམ་རྒྱལ་གྱིས། འཇེན་པ་ནི་དངོས་པོ། རླུགས་པ་ནི་ལུག་པ། ནོངས་པ་ནི་ཉེས་པ། འཕྱེ་བོ་ནི་གོང་པོའམ་ཡན་ལག་མེད་པར་ལྟོ་བས་འགྲོ་བ། ལྕེ་རྟེན་ནི་བརྗོད་པའམ་སྙད་འདོགས་པ།

སྲིབས་པ་ནི་བསྒྲིབས་པའམ་གྲིབ་རིའམ་མཚན་མོ། སླག་པ་ནི་པགས་པའི་གོས། སྡོད་པ་ནི་འཕེན་པ། ཁོལ་མའམ་བ་གླང་མིག་ནི་སྐར་ཁུང༌། འགྲིམ་པ་ནི་འགྱེད་པ། མུར་ཐུག་ནི་མཐར་ཐུག ཕོལ་བ་ནི་རྟོགས་པ། ལ་ཟླས་པ་ནི་ཐག་བཅད་པ། ལ་ཟློ་བ་ནི་མཐའ་འགེགས་པའམ་ཐག་གཅོད་པ། མི་ཆ་བ་ནི་མི་ཤེས་པ། ཆ་མེད་ནི་རྒྱུས་མེད། གཏོལ་མེད་ནི་ཐབས་མེད། ཅི་གར་ནི་ཇི་ལྟར། ཅི་ཆིབ་ནི་མཐར་ཕྱིན། གར་ཅིག་ནི་གང་ཞིག སྨྱན་ཀ་ནི་གཉེན་ཀ འབགས་པ་ནི་ཉམས་པ། དམུན་པ་ནི་བླུན་པ། ཤོབ་དང་ཤོ་བེ་ནི་རྫུན། ཤིང་ཟན་ནི་རོ་ཟན། ཤིད་ནི་གཤིན་པོ་ལ་དམིགས་པའི་དགེ་བ་བསྒྲུབས་པ། ཕྲུ་མ་ནི་ཕོ་བྲང་ངམ་དམག་སྒར། སྤོང་བ་ནི་རྩེ་བ། བརྟུན་པ་ནི་བརྩོན་པ། སྒོ་འཕར་ནི་སྒོ་གླེགས། སྤྱོས་པ་ནི་བསྡིགས་པ། སྙོམ་པ་ནི་གཡེལ་བའམ་སྙོམ་ལས། དབྱེ་ཚོང་ནི་ཚོང་ཁང༌། ཐང་ལ་ནི་བཀྲམ་པ། བསླན་པ་ནི་བསྡུས་པའམ་ཕྱོགས་གཏོགས། ཚོག་ཕོར་ནི་རྫོགས་པར། རྭ་བ་ནི་བཅད་པའམ་གཞོགས་པ༑ གཟེངས་པ་ནི་བརྐྱང་བའམ་གཟི་བྱིན། འཚེག་པ་ནི་འཇིག་པ། གློས་པ་ནི་རྨོངས་པ། རྨེན་མེད་ནི་གཏན་མེད། གཡེན་སྤྱོ་བ་ནི་ཅོ་འདྲི། གཡམ་ནི་ཞར། རྨེད་པ་ནི་གསོལ་བའམ་དྲི་བ། སློང་ཕོར་ནི་ལྷུང་གཟེད། བྱ་མ་རྟ་ནི་ཉན་རྣའམ་བང་ཆེན། འབྲོ་འཚལ་ནི་ནད་པ། རྣང་ནི་ཞིང༌། ད་བུར་ནི་སྲེག་གནས། བསྙད་པ་ནི་བཤད་པ། གཙུག་ལག་ནི་སྡེ་སྣོད་དམ་གསུང་རབ། གོ་རེ་ནི་རྫོགས་པ། བརླང་པོ་ནི་རྩུབ་མོ། གཞོགས་སྟེགས་ནི་སྒེག་ཆོས། ཤུར་བུ་ནི་སྐ་རགས། གཏོས་པ་ནི་ཚད་མེད། སྦད་ནི་པུ། བརྩང་བ་ནི་བསང་བ། འཛན་མོ་ནི་བགྲོད་བྱ། འཛན་ཕོ་ནི་བགྲོད་བྱེད། འཇུད་མཐུན་ནི་སྨད་འཚོང༌། འགྲེ་བ་ནི་གཡོ་བ། འཐུར་བ་ནི་འཁྲུགས་པ། འཐབ་ཀྲོལ་ནི་གནོད་རྒྱུ། དོ་ཟན་ནི་མཆིང་བུ། ཁོང་སྙོམ་པ་ནི་སྒྱིད་ལུག་པ། དཀྱུས་མོ་ནི་མགྱོགས་པ། དང་ལ་ནི་རྫིང་བུ། ཀླབ་པ་ནི་ལ་བ། དམ་རྒྱ་ནི་ཁྲིམས། ཞ་སྒྲེ་ནི་རྣ་མེད། ལྟག་སྒྲེ་ནི་ལྟག་ཐེར། གོར་མོ་ནི་སྡང་སེམས། སྦུབ་མོ་ནི་བོར་ཤུགས། སྣ་སྦྲང་ནི་མདེའུ། བཤུག་པ་ནི་བསླང་བ། པུས་མཁྱུད་ནི་སྒོམ་ཐག གཡར་ནི་གདོང་ངམ་མདུན། བྱུར་བུ་ནི་སྤུང་བ། ཐགས་རན་ནི་བཏགས་པ། རྨས་པ་ནི་ཉམས་པ། མངན་ནི་མཐུ། གསུག་པ་ནི་རྔན་པ། བརྔན་པ་ནི་མཆོད་པ། རྣམ་འདལ་ནི་རྣམ་འདུད། དཔྲེས་པ་ནི་བརྫེས་པ། བསེན་ཁུས་ནི་གཉེན་བསླུས། བརྒྱད་བཀག་ནི་བཀྱོན་པ།

བཟླུགས་པ་ནི་ཞུས་པའམ་དྲིས་པ། འོ་ནི་ནི་ཁོ་ནིའམ་འདི། མི་སློན་ནི་མི་བཟློག འབྲོངས་ནི་ཉེ་བར་བསྟེན་པ། གོ་ར་ནི་བཙོན་ར། ཡ་མ་བརླ་ནི་སྙིང་པོ་མེད་དམ་མི་བདེན། སླར་རོལ་ནི་ཕྱི་རོལ། ཆང་ཐུབ་ནི་གང་ཟག། དོག་མ་ནི་མདུན། འཕག་པའམ་ཆབ་ནི་འཇུག་པ། རན་པ་ནི་ལྕུག་ཕྲན། རེང་བ་ནི་འབྲེལ་མེད་དམ་རྐྱང་པ། མི་འགོང་ནི་མི་ཞུམ། ཐན་ཀོར་ནི་ཉེ་འཁོར། བོག་རེ་ནི་བ་གམ། མ་སྟེས་པ་ནི་མ་ལེགས་པ། སྟེས་དབང་ནི་སྟོབས་ཤུགས། གནའ་བོ་ནི་སྔོན། སྣ་བོ་ནི་གཙོ་བོ། མི་གུ་ནི་མི་ཞུམ། བེ་ནོ་ནི་འཛིན་པ། ཉེའུ་གྱི་ནི་བཅུད་ཚོར༌། ཉེན་ནི་རྨང༌། གདོང་མོ་ནི་མཇུག་ངོའི་ནང༌། རྣིལ་ནི་སོ་རྙིལ། ཆུ་བྲུབ་པ་ནི་ཁོལ་བའམ་རྦ་ཀློང༌། ལས་ཡན་ཀིན་ནི་ཁ་ཕྱེར་རམ་སྟེགས་བུ། གཞགས་པ་ནི་བརྒྱན་པ། འདྲུབ་པ་ནི་འཚེམ་པ། དྲུབས་པ་ནི་བཙེམས་པ། ཆན་པ་ནི་ཁྱེ་བོའམ་གྲི་གུག ཇེང་ནི་དབྱངས། གྱ་ཐོ་ནི་རྣ་རྒྱན། ལན་བོན་ནི་ལན་སློན། ཐེར་ཟུག་ནི་འགྱུར་མེད། རྔུབ་རེ་ནི་ཧུར་རེ། བྲུག་པ་ནི་འདྲལ་བ། ཚིག་བརྩིག་ནི་ཚིག་བཙུན། གཞོགས་མ་ནི་སྟེང་གཡོགས། ཉུག་རུམ་ནི་རླིག་ཕྱུང་ངམ་འབྲས་བུ་བཏོན་པ༑ གཞལ་བ་ནི་མགུ་བ། བསྐྱད་པ་ནི་བསད་པ། ག་གེ་ནི་ཡུལ། ཆེ་གེ་ནི་གང་ཟག་གི་མིང་གི་སྤྱི། ཕྱི་བི་ནི་ཕྱི་རོལ། དགུན་གདུང་ནི་ཚད་གདུང༌། མོང་བརྟུལ་ནི་བླུན་པོ། ཕ་བི་ནི་ཕ་རོལ། ལུང་བོང་ནི་བ་གླང༌། ཕོལ་མིག་ནི་འཁོར་ལོའམ་ནད་ཀྱི་བྱེ་བྲག་ལའང་འཇུག མཚུན་པ་ནི་བསོད་ནམས། མཆེས་པ་ནི་ཁས་ལེན། འཕེའུ་ནི་གསོལ་བ། ཆེ་ཞེ་ནི་ཅི་ཞེས། གཞའ་གསང་ནི་གཡུང་དྲུང༌། དམ་དེམ་ནི་དམ་བཅས། ཕྱང་ཕྲུལ་ནི་རྣ་རྒྱན། དབུ་རྨོག་ནི་དབུ་འཕང༌། ཡིད་སྨོ་ནི་ཡིད་དགའ། གཉི་ཟེར་ནི་ཉི་ཟེར། གཏིགས་པ་ནི་འཁྲིགས་པ། གདུད་པ་ནི་འདུད་པ། སྦོམ་པ་ནི་ཟ་བ། རྙོང་བ་ནི་བརྐྱང་བ། ཞེ་ལ་འབྱོར་ནི་སེམས་ལ་འགྲོ་བ། འཁྱུད་པ་ནི་འཆུག་པ། འདྲིད་པ་ནི་བསླུ་བ། འཕོ་བ་ནི་འཕེན་པ། ཙེན་ནེ་ནི་ཐམས་ཅད༌། བྱེར་བ་ནི་སོང་བ། གཟོད་མ་ནི་དང་པོ། རིལ་ནི་ཐམས་ཅད། འཛེག་པ་ནི་ཕྲད་པ། གཟེབ་ནི་གུར། ཀློང་དུ་གྱུར་པ་ནི་དབང་དུ་གྱུར་པ། མི་བཟེད་ནི་ཆེན་པོ། གཅམ་བུ་ནི་བཅོས་མ། འཆོབས་ཤིག་ནི་གསངས་ཤིག གཉོད་ཀ་ནི་མཁོས་ཀ ངོམ་པ་ནི་སྟོན་པ། གཟུ་ལུམ་ནི་རང་བཟོ། གླགས་པ་ནི་འཁེབས་པ། ལུད་པར་ནི་བྱུར་བུར། གནོངས་པ་ནི་ཉེས་པ། དོང་སྟེ་ནི་སོང་སྟེ། དཔེན་པ་ནི་མཁོ་བ། ཇིས་ན་ནི་ཅིས་ན། བློ་ཅིང་ནི་བརྗོད་ཀྱང༌། གཞོག་པ་ནི་འཇོག་པ། ཀོས་ཐག་ནི་ཉམ་ཐག བཏུལ་བཅིལ་ནི་སྦྱངས་པ།

ཁྲེན་ནི་སྐྱོན། གྱིན་ཏ་ནི་རྒྱུ་མེད། སྔ་མཁོ་ནི་སྔ་མ། སྨྱུར་ཏེ་ནི་མྱུར་དུ། ཁ་སྦོམ་ནི་ཁ་ཏོན། འོ་ནི་ནི་འདི་ནི། འོན་ཅིག་ནི་བྱོན་ཅིག ལྡེམ་པོ་ནི་དྲང་པོ་མིན་པ། ཉིད་དོར་ནི་ངེས་པར། བྱོས་ཤིག་ནི་གྱིས་ཤིག རངས་པ་ནི་བདེ་བ། ཁོང་འཁྱིད་ནི་ཁོང་འབྱིན། གཏུ་ལུམ་ནི་བཟི་བ། གྱུ་བ་ནི་བཀྲུ་བའམ་སྐབས་ལ་ལར་ང་རྒྱལ་ཅན་ལ་ཟེར་བའང་འདུག ཕོ་ཐེག་ནི་ཁུར་ཁྱེར། རྨེ་བ་ནི་སྨྲ་བ། སྨུན་པོ་ནི་བླུན་པོ། འཕན་པ་ནི་ཆག་པ། ག་ཐག་ནི་གང་དག སྦེན་ཞ་ཏ་ནི་ཡང་དག་མིན། འོར་འགའ་ནི་རེས་འགའ། འོ་ཅོག་ནི་ཐམས་ཅད། བྱ་རྐོན་ནི་བྱ་རྒྱ། གཉིག་ཏུ་ནི་གཅིག་ཏུ། འདི་ཀོ་ནི་འདི་ནི། འབོགས་པ་ནི་བརྩོན་པའམ་བརྒལ། གོ་ཅོག་ནི་ཐམས་ཅད། ཞག་སྟེ་ནི་མགུ་སྟེ། གཞེན་འདེབས་ནི་བསྐུལ་བ། ཕོན་ཏེ་ནི་ཕན་ཏེ༑ འགོ་བ་ནི་བླང་བ། འདུ་མཆེད་ནི་ཐབས་དང༌། འུང་ནས་ནི་འདི་ནས། ཉིད་གྲུལ་ནི་རིགས་ངན། རྡང་མོ་ནི་དམོད་མོ། རང་ཉམས་ནི་རང་བཞིན། འགྲན་ཐོར་གལ་བ་ནི་འགྲན་ཟླར་གལ་བ། ཡིབས་སུ་ནི་དབྱིབས་སུ། བླ་ཁྱད་ནི་དྲེགས་པ། བདར་བ་ནི་སྟེར་བ། འུང་ཏིང་ནི་འོན་ཀྱང༌། གཉེན་ཏེ་ནི་བོས་ཏེ༑ འོར་བ་ནི་སྐྱོབ་པའམ་བོར་བ། ཕ་ལོགས་ནི་ཕ་རོལ། སྦུ་བུ་ནི་སྦུ་གུ། གྱིམ་ཤིང་ནི་རོལ་མོ། ཆོ་ལོ་ནི་རྒྱན་པོ། ཟུས་ནས་ནི་ཟུག་ནས། བློན་འདེབས་ནི་ཆོས་སྟོན། རྒྱ་རྣ་རུ་ནི་མི་ཚངས་སྤྱོད། འགྲོང་བ་ནི་རྨ་སྒོ༑ མཆིས་འབྲང་ནི་ཆུང་མ། རེ་རྨ་ནི་བུད་མེད། མ་དྲངས་ནི་མ་དུལ། ཟླུག་པ་ནི་གནང་བ། གཞོངས་ནི་ལྗོངས། འཇེབས་ནི་ཕན་པ། བརྩུ་བ་ནི་བསུ་བ། དམས་པ་ནི་ཉམས་པ། ཡུས་ཏེ་ནི་བདེན་ཏེ། རྨེན་ངན་ནི་ལྟས་ངན། བན་ལ་ནི་བྱས་གླག གཏི་ན་ནི་སྨྲེ་བ། སླད་བཞིན་ནི་ཕྱི་བཞིན། འཕྱན་པ་ནི་འཁྱམ་པའམ་ཡན་པ། བཀུམ་པ་ནི་བཅད་པ། མཚུན་ནི་ཕ་མེས། ཉེ་གནས་ནི་སློབ་བུ། རྙིས་པ་ནི་རྙིངས་པ། འདས་པ་ནི་དེས་པ། སློས་པ་ནི་ཟློས་པ། སྨྱོ་བ་ནི་ཞན། ལེའུ་གློན་ནི་ལན་འདོན། དགུམ་དུ་ནི་བཅད་དུ༑ འདྲག་མཐིལ་ནི་ལག་མཐིལ། བུམ་བུ་ནི་བུམ་ཆུང༌། རྩིག་གུ་ནི་རྩིག་པ། བྲུངས་ཀྱང་ནི་ཀུང་ཀྱང༌། ནན་ཐུར་ནི་ནན་ཏན། གཡུར་རམ་ཡུར་ནི་གཉིད། སྒྲེའུ་ཆུང་ནི་འཛག་སྣོད། བར་ཏང་ནི་སྟན་འབོལ། ཡུ་བུ་ནི་རང་རེ། གཏན་པ་ནི་སྲ་བརྐྱང༌། ཀོག་ཚེ་ནི་སྙིང་ཐག སྨྱུང་ནས་ནི་བཅུག་ནས། དགུ་སྟེ་ནི་ལྷག་སྟེ༑ དཀྱེལ་བ་ནི་སྦྱིན་པ། མ་ལ་ནི་མོད་ལ། འདོད་འགྲོ་ནི་སྨད་འཚོང༌། ངོག་གོ་ནི་ནོན་ཏོ། ཐོང་ཁོར་ནི་གར་བུ། འགེབས་པ་ནི་སྒྲིབ་པ།

ཁྲོལ་བ་ནི་ཤེས་པ། མཚན་དཀོར་ནི་མཚན་ལེགས། དུབས་སུ་ནི་དུས་སུ། ལག་ཏུབ་ནི་མགྱོགས་པ། ལྡོངས་པ་ནི་ལོང་བ། དམིགས་བུ་ནི་ཁྲིད་བྱེད། དོག་ན་ནི་སོང་ན། འོལ་ཡང་ནི་དཔེ་ཡང༌། མོང་མི་དམའ་བ་ནི་དཔང་ནི་མཐོ་བ། སྐྱང་ནུལ་ནི་ཞལ་ཞལ། ཡུགས་ཤིག་ནི་བྱུགས་ཤིག ཞེ་འོ་ནི་ཟེར་ཏོ། ལྡུང་རུས་ནི་ལྟུང་འབྲས། རྩལ་བ་ནི་བྱིན་པ། འཛེར་ཏོ་ནི་སྨྲས་སོ། དུག་ཁང་ནི་ཁྲུས་ཁང་ངམ་བསྲོ་ཁང༌། དཔྱ་བ་ནི་འཕྱ་བ། སྔ་ཟ་ནི་སྔ་བ། བར་ཐང་ནི་ཕྲུམ་སྟན། ཁུ་ཤ་ནི་ཤ་ཁུ། འདེ་གུ་ནི་སྐྱོམ་བུ། ཐམ་ལག་ནི་མན་ངག གནང་བར་བཞག་པ་ནི་ལེགས་པར་བརྒྱན་པ། གཡམ་ལ་ནི་ཞར་ལ། འདྲུབས་པ་ནི་གསོས་པ། སྣམ་ཕྱིངས་ནི་ཕྱི་ས་ཁང་པ། དེ་མོ་ནི་དགོས་པ། སྐུན་བུ་ནི་གཞོང་བུ། ཡ་གང་ནི་རྐང་རྟེན། ཅི་ཆོག་ནི་ཅི་ཡོད། ཐ་གི་ནི་ཞི་བ། རྒྱུ་ཁུ་ཅན་ནི་གཅེར་བུ་པ། གཟར་ཐག་ནི་དཔྱད་ཐག ནོད་པ་ནི་ལེན་པའམ་ཐོབ་པ། ཕྱི་མོ་ནི་བཙུན་མོ། སླས་ནི་བཙུན་མོའི་འཁོར། བླངས་ཀྱང་ནི་སླར་ཡང༌། རིམས་ཤིག་ནི་དྲོངས་ཤིག གྱོང་རལ་ནི་ས་ཞག ཆེམས་བཞག་ནི་འཕྲིན་བཞག ཤུལ་དུ་ནི་ལམ་དུ། མད་པ་ནི་བདེན་པ། སྤྱན་པ་བ་ནི་བྱ་ར་བ། གཞིལ་བ་ནི་བཅོམ་པ། ཚིག་གུ་ནི་འབྲས་བུ། རེགས་པ་ནི་བྲེག་པ། སྐྱོས་པ་ནི་ཉམས་པ༑ སླ་བ་ནི་ཟླ་བ། ཉུལ་བ་ནི་བུལ་བའམ་འགོར་བ། གཞར་བ་ནི་མཐུན་པ། མཁའ་འཕྲིང་ནི་ཕོར་ཤུབས། རབ་པས་ནི་བཙན་པ། ཕྱོགས་གཅིག་ནི་ཁོར་གཅིག ཆེད་འགའ་ནི་རེས་འགའ། སྐྱོ་སྔོགས་ནི་འཁྲུག་ལོང༌། བགས་ཀྱིས་ནི་རིམ་གྱིས། ཚང་ཐུར་ནི་གོས་ཤུབས། བརླ་བརྙང་ནི་སྣོན་པ། བརྙས་པ་ནི་གཡས་པ། བརྙན་པ་ནི་གཡར་བ། འཆོང་ཤིག་ནི་ཆོངས་ཤིག ཁོམ་པ་ནི་ངལ་བ། ཕོ་ལོང་ནི་གྲུ་གུ ཕྱག་ལས་ཁོམ་ནི་ར་རོ་བ། དགུམ་པ་ནི་གསོད་པ། བར་འགའ་ནི་རེས་འགའ། རྨེད་དུ་ནི་གསོལ་དུ། ལྒོ་ལྒོ་ནི་སྤང་ཤ། འཁོབ་པ་ནི་ངན་པ། འགུམ་པ་ནི་འཆི་བ། བཀུམ་པ་ནི་བསད་པ། གོར་མ་ནི་རྡོ་བ། འཁྲུན་རིང་ནི་མཆུ་རིང་ངམ་དཀྱུས་རིང༌། བརྣོགས་ཏེ་ནི་བསྔམས་ཏེ། མནགས་པ་ནི་བསྲན་པ། ཆེ་ཞེ་ནི་ཨ་ཆེའམ་སྲིང་མོ། ཆ་བྱད་ནི་ཆ་ལུགས། འབྱེས་པ་ནི་མཛེས་པ་འམ་མཚམས་ཕྱེད་པ། མི་ཆོག་ནི་མི་ཕོད། ཤིང་ཐགས་ནི་ཅོག གཡེར་བག་ནི་སྣང་གཡེལ་ཅན། རྩང་ནན་ནི་བཏུང་བ། འཐམས་པ་ནི་བྱམས་པ། འཁམས་པ་ནི་བརྒྱལ་བ། སྡུམ་མཚེས་ནི་ཁྱིམ་མཚེས། མ་ནངས་ནི་མ་ལངས། བརླམས་པ་ནི་བསྐྱོད་པ། སྦལ་དུ་ནི་དོད་དུ། དྲལ་བོ་ནི་མིང་བོ། ནངས་ཀྱི་ནི་སྔོན་གྱི། གོར་བུ་ནི་གྲུ་བཞི།

སྒྲེ་བོ་ནི་ས་རྗེན། འོད་པ་ནི་ཡོད་པའམ་ཆུ་ལམ་འོབས་ལ་ཟེར་བའང་འདུག ཙུམ་པ་ནི་འོ་བྱེད་པ༑ རྣ་རུ་ནི་འཁྲིག་པ། མདུད་པ་ནི་འཆིང་བ། དུས་བབ་ནི་འཆི་བ། དུས་འདས་ནི་ཤི་བ། ཕྱུང་ཕྱུང་ནི་གཞོན་ནུ་མ། སྣོག་གཟན་ནི་འཁུར་བ། དུས་བྱེད་ནི་མི་འཚོ། བྱ་མོ་ལབ་ནི་མཆོད་པའི་རྫས། ལན་ཀན་ནི་སེང་མའམ་པུ་ཤུ། རྒྱུན་ལུགས་ནི་རྒྱུ་འགྲུལ། བསེལ་བ་ནི་སྐྱེལ་མ། གཡར་ངོ་ནི་གདོང། གཡང་ལེན་ནི་ཁས་ལེན། གཡར་འདྲེན་ནི་སྤྱན་འདྲེན། གཡར་དམ་ནི་དམ་བཅའ། གཡར་ལམ་ནི་མདུན། གཡར་ཚ་ནི་ངོ་ཚ། གཡར་ཁམས་ནི་སྐུ་ཁམས། མི་འཚལ་ནི་མི་ཚབ། སྒེའུ་ཆུང་ནི་འགྲོ་བ། དྲུངས་པ་ཉག་ནི་རྩ་བ་ནག། འགྱུར་བྱེད་ནི་པྲ་ཆལ། མིངས་ནི་མི་ནད་དམ་རིམས་ནད། ཐོག་པོར་ནི་ཐོག་ཉམས། འཁོད་པ་ནི་འདུག་པ། དོ་སྒེར་ནི་ཐོག་ཙུག སྦེབས་པ་ནི་ཉེན་པ། ཞལ་ཚུས་ནི་ཞལ་ཟས། ལོང་བུ་ནི་ཤིང་ཏོག ལྡུམ་བུ་ནི་ཤིང་ཏོག འཁོས་སུ་བབ་པ་ནི་ལོགས་སུ་བཞག་པ། གཟུགས་ཅན་མ་ནི་སྨད་འཚོང་མ། འོས་པ་ནི་གཅེར་བུ་བ། ག་ཤེས་ནི་ཁ་ཟེར། རྩེན་པ་ནི་རྩེ་བ། ཐོམས་ཤིག་ནི་སོམས་ཤིག མཐོལ་ནི་སྨྲ་བའམ་མི་སྤོང་བ། གཤོས་པ་ནི་འཁྲིག་པ། སྨོས་འདྲིན་ནི་གྲོགས་པོ། ནེའུ་ལྡང་ནི་ན་ཟླའམ་ན་མཉམ། འཁྲོགས་ནི་ཁྲི། བགྲོས་པ་ནི་གླེངས་པ། དོན་མཐུན་ནི་མགྲོན་པོ། བསྐྱུང་བ་ནི་ཆུང་ངུ༌། མ་དྲངས་ནི་མི་བསྲུན། གུམ་པ་ནི་ཤི་བ། ཆེན་ཐགས་ནི་ཕྱུགས་ནད། ཁ་དག་ནི་ཉམ་ཐག མ་གླས་ནི་ཁྱད་བསད། འཚོག་པ་ནི་གཤེགས་པ། ནོངས་པ་ནི་ཤི། འདབ་ཤོག་ནི་ཉེས། ལྷད་པ་ནི་བྱི་བ། དྲལ་བ་ནི་ཞིག་པ། ཅོ་ཏོ་ནི་མགོ་སྤུ༑ བསྡུམ་ཐབ་ནི་ཁྱིམ་ཐབ། སྐྱིན་གོར་ནི་རྩངས་པའམ་གངས་སྦལ། ཁྱོ་ཤུག་ནི་བཟའ་ཚོ། རན་ནི་རྩྭ། གཡར་ཁྲལ་ནི་ཁ་ཁྲལ། ཀེའུ་ནི་རི་སྒོག ཀུན་དོང་ནི་སྒོག་པ་འམ་བཙོང་ལ་ཟེར་བའང་སྣང༌། ཇེ་ནི་དེ། ཇི་ག་ནི་གང༌། གླེ་བ་ནི་སེལ་བོ། ཞུགས་ནི་མེ། བསྐལ་བ་ནི་བཀྲུ། སྲེལ་ནི་མུག་པ། སྲེལ་ཟན་ནི་མུག་ཟོས། སྲིལ་ནི་སྲོག་ཆགས་མུག་པ་ཞེས་པའང་འདུག ལྷུང་བཟེད་གྱུ་ནི་བཀྲུས་ནས་བཞག ཏི་ཙ་ནི་འོག་གདན། ཕྱག་སྦལ་ནི་བཙོན་དོང༌། གསུད་པ་ནི་མ་ཞུའམ་སྒྲེགས་པ། བཟང་མཁན་ནི་གོས་བཟོ། ཡ་ཁད་ནི་སྟེང་སྐས། རྐང་རྟེན་ནི་སྟེང་འཛེག་ཐེམ། སྐྱུ་རུམ་ནི་ཚོད་མ། ཁབ་རལ་ནི་ཁབ་སྣོད། ཆོལ་བཟང་ནི་བཀྲུ་ཆུའི་སྣོད། རོ་ཉེ་ནི་བཤའ་ཚེའམ་ཞ་ཉེ་ནག་པོར་ཟེར་བའང་ཡོད། ག་གོན་དང་ཚོན་མོ་སྟེང་ནི་ཞ་ཉེ་ནག་པོ།

བསང་ཟེལ་ནི་བཤའ་རྡོ། བསྲེལ་ནི་འཆང་བ། དབྱུལ་ནི་མྱུལ་བ། གོ་རེ་ལོང་ནི་ལག་གཡོག་གམ་གད་བྱེད་པ། གཞི་བོ་ནི་རྒྱུན་སྡོད། མཚམས་བསྐུམ་པ་ནི་མཚམས་བཅད་པ། བཤུང་བ་ནི་དམའ་བབ། ནང་བཅས་ནི་ཞེ་འགྲས། ཁྱེར་ནི་ཁང་ཐོག དཔོང་ས་ནི་ཆོས་གྲྭ་སོགས། གོར་བུ་ནི་སྟན་ཟླུམ། ཚར་ནི་ཕྲེང་བ། པར་ཐང་ནི་ས་གདན། ཨ་མོ་ནིག་ནི་སྟན་རིང༌། བསྙིལ་བ་ནི་ཕྱིར་འདོན། བསེལ་བྱེད་ནི་ལམ་སྐྱེལ། ཐགས་མ་ནི་སྣེ་ཟུར། གོ་ལོས་ནི་ཁ་ཟེར་ཙམ། གྱིང་གོང་ནི་ཞི་བ། འབྲམ་ཟེར་ནི་དུམ་གྲུགས། དངར་བ་ནི་བསྒྲིགས་པ། འཁོས་སུ་བབ་ནི་འདུན་པ། རྩེ་རྒོད་ནི་འཁོར་གཡོག་གམ་ལྷ་འབངས། ལོངས་པ་ནི་རྒྱགས་པ། ལག་གི་བླ་ནི་ལས་དཔོན། ལྟག་འོག་ནི་སྔ་ཕྱིའམ་གོང་འོག སྤུན་པ་ནི་བསྟུན་པ། ཐོག་ཐོག་ནི་དང་པོར། རེག་ཟེག་ནི་བྲིས་སམ་བཀས་བཅས། བོན་པ་ནི་ཟླས་པ། ཐེབས་པོ་ནི་མི་མངོན། རིངས་པོ་ནི་བརྩོན་པ། སྦུལ་བབ་ནི་རུང་བ། མིག་རྔུ་མ་ནི་མིག་གི་དྲི་མའམ་སྐྱོ་མ། གཏམ་འདྲེས་པ་ནི་ཕེབས་པར་སྨྲ་བ། དབོས་པ་ནི་སྦོས་པ། སླད་ཚ་ནི་མི་གཙང་བའམ་བཤང་བ། ཤ་ཆགས་པ་ནི་བློ་ལ་ཡོད་པ། ཀྱལ་ཀ་ནི་ཀུ་རེའི་ཚིག བསྟང་བ་ནི་མགོན་ནམ་གྲོགས། དུས་པོ་ཆེ་ནི་འཛིན་པ་ཆེ་བ། ཉིང་ཤ་ནི་རང་གི་ཤ སྟོང་བ་ནི་ཕན་པའམ་གྲོགས། དཀོར་ནི་ནོར་གྱི་ཞེ་ས། ཀ་ཅ་ནི་ནོར་གྱི་སྤྱི་མིང༌། དཀྱེལ་ཆེ་བ་ནི་ཁོང་ཡངས་པ། ཆུ་གད་ནི་སྙིང་སྟོབས། སྐྲུས་པ་ནི་གཅོད་པ། སྒྲུན་པ་ནི་འགྲན་པ། བསྐྲུ་བ་ནི་གཞན་ལ་ཐབས་ཀྱིས་འབྲད་པ། མན་ནི་ཚོང་དང་དུས། ཇུ་བོ་ནི་རྡོ། ཤ་ཀོན་ཞུགས་པ་ནི་ཁོན་ཡོད་པ། མཉེལ་བ་ནི་ངལ་བ། བརྡུལ་ནི་བསྡུས་པའམ་འཇམ་པ། འཁྲུན་ནི་འཕང་ངམ་སྲིད། འདྲེན་མ་ནི་སྣ་ཚོགས་འདྲེས་སྲམ་ཁྲ་བོ། མནག་དཀའ་ནི་སྲན་དཀའ། མནོག་ཆུང་ནི་ཁ་ཆུང་བ། ཕྱང་ངེ་ནི་འཇོལ་ལེབ། བྱུག་རིས་ནི་གྲེལ། ནུ་རྫི་ནི་ཉིང་ཁུ། དགོང་བ་ནི་སྨད་པ། ཤིན་ཏེ་མ་ནི་ཆུད་ཟ་བ། སག་རྩ་སྐྱེལ་བ་ནི་སྦུངས་སྐྱེས་པའམ་དམ་བཅའ་བརྟན་པ། སྐྱོ་མ་ནི་ཕྲ་མའམ་ཕྱེ་བ། སྦོན་པ་ནི་གཏོང་བ། སྦུན་པ་ནི་བསྲེས་བའམ་རྫུན་པ་ལའང་འཇུག སོ་སྟོ་ནི་སོ་ཟིང༌། སྦྲེབས་པ་ནི་ཟས། བཏོགས་པ་ནི་ཕྲོགས་པ། སྨྲེ་ནི་སྡུག་བསྔལ། རྨྱ་བ་ནི་ཉམས་པ། ཆུམས་པ་ནི་ཆགས་པ། དུས་ཀྱིས་འཆུ་བ་ནི་དབང་གིས་འཆུ་བ། སྦང་བ་ནི་མི་འཇིགས་པ། སྨྱུགས་པ་ནི་བཅུག་པ། དཀྲེ་ནི་ཕོ་མཚན་གྱི་ཏོག ཀོག་རྩེ་ནི་རྒྱའམ་རྙི་རྙོང༌། ཐེར་ཏོ་ནི་རྩེ་མོ། རྫི་ནི་རླུང༌། བཏུངས་པ་ནི་བསད་པ། ཝན་པ་ནི་སོང་བ། རམ་ཤག་ནི་འགྱོད་པ། ལྟོག་མོ་ནི་ཁུད་པ། ཚང་མང་ནི་ཐབ་ཚང༌། གདུགས་ནི་ཉིན་མོ། དགུང་མོ། མཚན་མོ། བསེར་བུ་ནི་རླུང༌།

བསྒོ་བ་རྣར་གཟོན་ནི་བསླབ་བྱ་ལ་མི་ཉན་པར་ཕྱིར་བཟློག་པའམ་བསྐུལ་ཚིག་དང་དུ་མི་ ལེན་པ། མནོ་བ་ནི་སེམས་པ། ལྔ་པ་ནི་འཆི་བ། ཆེ་ཞེ་ནི་ཁྱོ། ཆེ་ཞི་ནི་ཆུང་མ། འབེལ་གཏམ་ནི་ཡང་དག་པའི་གཏམ། ག་གོན་ནི་ཉུང་མ། མངན་བགྲང་ནི་སྐྱོན་ནས་བརྗོད་པ། མཆོར་ནི་མཛེས་པ། ཅི་ག་ནི་དེ་སྐད། འཇོར་བ་ནི་ཏོག་རྩེའམ་འཇུག་ཐུག གཉུམ་མ་ནི་གདོད་མ། འདོ་བ་ནི་རྟ། རྩབ་མོ་ནི་རབ་བྱུང་གི་བཏུང་བའི་ཁྱད་པར། འཚེམ་པ་ནི་རྨོག འཛོལ་བ་ནི་ནོར་བ། འཛེད་པ་ནི་བཟེད་པ། འཛབ་ནི་སྔགས་བསྙེན་གྲོགས་བྱེད་མིང༌། གཞུངས་པ་ནི་རབ་ཏུ་གྲུབ་པ། གཟིགས་དང་གཟོན་ནི་ལུས་དང་ངག་གི་ཁྱད་པར། གཟེགས་མ་ནི་ཆ་ཤས་ཙམ། ཟོལ་མ་ནི་གཡོ་སྒྱུ། སྲུལ་བ་ནི་རུལ་བ། དཀུ་ནི་ལུས་ཀྱི་སྟ་ཟུར་རམ་དྲི་མི་ཞིབ་པ་ལའང་འཇུག འབྱོར་བྱིན་ནི་གཡོ་སྒྱུ། བཀའ་མཆིད་ནི་གླེང་མོ། བཀོལ་བ་ནི་བཀར་བའམ་ལས་བཀོལ་སོགས། བཀད་ས་ནི་གཡོས་ཁང་ངམ་འདུག་ས། དཀོན་པ་ནི་སྣང་བ། མཁུ་བ་ནི་ལྡོག་པ། ག་ག་ཚིལ་ནི་སྐྱི་གཡའ་བ། གོབ་ལོན་ནི་བྱ་སླ། གལ་བཟུང་ནི་སུན་འབྱིན། གོར་མ་ནི་རྡོ། གར་བུ་ནི་ལྗགས། བརྡེད་པ་ནི་འདྲིད་པ། ཅི་ཞིག་ལྟར་ནི་འབད་རྩོལ་མེད། མུ་ཅོར་ནི་རྫུན། ལ་ག་ཅན་ནི་ཤོ་གམ། བཅོམ་ནི་ཁེངས་དྲེགས། ལྕམ་ནི་སྲིང་མོ། མི་མཇེད་ནི་བཟོད་པ། འཇའ་དང་འཇུམས་པ་ནི་ཁེངས་པ་བཏང་བ། འཇང་བ་ནི་ཟ་བའམ་བཏུང་བ། ཉན་རྣ་ནི་ཕག་ཉན། སྣང་བརྙན་ནི་སྣང་ལ་རང་བཞིན་མེད། ཉོན་མོངས་ནི་ཆགས་སོགས། སྙོན་མོངས་ནི་སྡུག་བསྔལ། བསྙེན་པ་ནི་ཉེ་བ། བསྲིངས་པ་ནི་རིང་བ། བསྙིལ་བ་ནི་བསྐྲོད་པ། གཏོལ་མེད་ནི་ཆ་མེད། གཏུར་བུ་ནི་ཆོས་གོས་ཀྱི་སྣོད། བརྟོན་ནི་ཡིད་བརྟན་རུང༌། བསྙིལ་བ་ནི་བསྐྲོད་པ། གཏོལ་མེད་ནི་ཆ་མེད། གཏུར་བུ་ནི་ཆོས་གོས་ཀྱི་སྣོད། བརྟོན་ནི་ཡིད་བརྟན་རུང༌། བསྟར་བ་ནི་རྡུལ་ཕྱིས། མ་ཐན་ནི་མ་ཞུམ། མཐང་ནི་ནང༌། དོག་ལེ་ནི་ཆུ་སྲོ་བའི་སྣོད་དམ་དབྱེབ་ལེའང་ཟེར། གདོས་བུ་ནི་སྣོད་ཆུང་ཆུས་གང་བ། བདའ་བ་ནི་ཞིམ་པ། བདར་བ་ནི་བྱི་དོར་རམ་ཕྱེ་མར་བྱས་པ། བདོབ་ནི་དར་བ། བདེན་པ་བདར་རམ་མདུན་དུ་བདར་ནི་དབང་དུ་བྱས་པ། གོ་མཐུན་ནི་སྣ་ཚོགས། གནག་ནི་ཕྱུགས། གནོག་པ་ནི་མང་པོ། ཐོ་ནི་གལ། རྣང་མ་ནི་ཞིང་ལས། བརྣན་པ་ནི་ངེས་བཟུང་ངམ་དགར་བའང་ཟེར། བརྣངས་ནི་ཡི་ག་གྱེན་དུ་འཕྱུར་བ། སྤགས་ནི་འཕགས་པ། སྤྱིན་ནི་འབྱར་བྱེད། ཁྱད་པར་ནི་རྟག་ཏུའམ་རྒྱུན་དུ། དབྲེ་ནི་རྩོག་པ། སྨག་ནི་མུན་པ། བསྙེམས་པ་ནི་ང་རྒྱལ། ཁད་ཀྱིས་ནི་དལ་བུ། ཉེ་ཞོ་མེད་པ་ནི་ལེགས་པའམ་སྐྱོན་མེད་པའམ་བཀྲ་ཤིས་པ་སོགས། དབང་ཐང་ཆེ་བ་ནི་སྐལ་བ་ཆེ་བའམ་དཔལ་ཆེ་བའམ་སྐལ་བ་བཟང་པོའོ།། །།

ཐ་མར་དགེ་བ་མཇུག་གི་དོན།

དེ་དག་ནི་བརྡའ་གསར་རྙིང་གི་རྣམ་བཞག་ཆེ་ལོང་ཙམ་བསྡུས་པའོ། །

དེ་ལྟར་རྒྱལ་བའི་གསུང་རབ་དགོངས་འགྲེལ་དང་བཅས་པ་ཆེན་པོ་ཧོར་གྱི་སྐད་དུ་ བསྒྱུར་བ་ལ་ཉེ་བར་མཁོ་བའི་གཞུང་ལུགས་མཁས་པའི་འབྱུང་གནས་ཞེས་བྱ་བ་འདི་ཉིད་ལ་ སྦྱངས་པར་འདོད་པ་རྣམས་ཀྱིས། བྱང་ཆུབ་ཀྱི་སེམས་དང༌། ཐེག་པ་ཆེན་པོའི་བསྒྲུབས་པ་དང༌། མཁྱེན་པ་གསུམ་དང༌། ཐེག་ཆེན་སྦྱོར་བ། སངས་རྒྱས་ཀྱི་སྐུ་གསུང་ཐུགས་ཀྱི་ཡོན་ཏན་ལ་སོགས་པའི་མིང་གི་རྣམ་གྲངས་ནི་ཕར་ ཕྱིན་གྱི་སྐབས་སུ་བལྟ་བར་བྱའོ། །

དེ་བཞིན་དུ་བདག་འཛིན་དང༌། ལྟ་ངན་དང༌། བདག་མེད་གཉིས་དང༌། སྟོང་ཉིད་ཀྱི་དབྱེ་བ། ས་བཅུ། བྱང་སེམས་ཀྱི་སྤྱོད་པ་ཕྱིན་དྲུག བསྡུ་བ་བཞི། བྱང་སེམས་ཀྱི་རྩ་ལྟུང༌། ཉེས་བྱས་སོགས་ནི་དབུ་མའི་སྐབས་སུ་བལྟའོ། །བདེན་པ་བཞི། རྟེན་འབྲེལ་བཅུ་གཉིས། ཕུང་པོ་ལྔ། ཁམས་བཅོ་བརྒྱད། སྐྱེ་མཆེད་བཅུ་གཉིས། སེམས་སེམས་བྱུང༌། ལས་དཀར་ནག་འབྲས་བུ་དང་བཅས་པ། ཉོན་མོངས་ཀྱི་རྣམ་གཞག སྣོད་བཅུད་ཀྱི་འཇིག་རྟེན་གྱི་ཁམས། དགེ་འདུན་ཉི་ཤུ། མཚན་ཉིད་གསུམ། བསམ་གཏན་གཟུགས་མེད་ཀྱི་ཏིང་འཛིན། ཞི་གནས་ལྷག་མཐོང་གི་རབ་དབྱེ་སོགས་ནི་མངོན་པའི་སྐབས་སུ་བལྟའོ། །

སོ་ཐར་རིགས་བརྒྱད་ཀྱི་སྡོམ་པ་ལེན་ཚུལ། མཁན་པོ་དང་སློབ་དཔོན་གྱི་རྣམ་གཞག ལྟུང་བའི་རྣམ་གཞག་ལས་བརྒྱ་རྩ་གཅིག་གི་དབྱེ་བ་སོགས་གཞི་བཅུ་བདུན་གྱི་སྐོར་ ནི་འདུལ་བའི་སྐབས་སུ་བལྟའོ། །ཕྱི་རོལ་བའི་གྲུབ་མཐའ་བཅུ་གཉིས། ནང་པའི་གྲུབ་མཐའ་བཞི་རྣམས་ཀྱི་ཐུན་མོང་མ་ཡིན་པའི་འདོད་པ་སོ་སོ་བའི་མིང་ནི་ གྲུབ་མཐའི་སྐབས་སུ་བལྟའོ། །གསང་སྔགས་ཀྱི་རྒྱུད་སྡེ་བཞི་སོ་སོའི་དབང། དམ་ཚིག སྡོམ་པ། རྒྱུད་ཀྱི་དབྱེ་བ། ལམ་གྱི་རྣམ་གཞག་རྣམས་ཀྱི་སྐོར་ནི་སྔགས་ཀྱི་སྐབས་སུ་བལྟའོ། །ཤེས་བྱ་ཡུལ་གྱི་རྣམ་གཞག ཤེས་བྱེད་ཚད་མ་དང་ཚད་མིན་གྱི་དབྱེ་བ། རྒོལ་ཕྱིར་རྒོལ་གྱི་རྩོད་ཚུལ་གྱི་སྐོར་སོགས་ནི་གཏན་ཚིགས་རིག་པར་བལྟའོ། །

སྒྲ་བསྒྲུབ་པ་དང། ཀློག་པ། ཨཱ་ལི་ཀཱ་ལི་འབྲི་ཚུལ། རྣམ་དབྱེའི་འཇུག་ཚུལ་སོགས་ནི་སྒྲ་རིག་པར་བལྟའོ། །རིག་གནས་བཅོ་བརྒྱད་དང། གཙུག་ལག་རྩིས་ཀྱི་སྐོར་གྱི་མིང་གི་རྣམ་གྲངས་ནི་བཟོ་རིག་པར་བལྟའོ། །ནད་དང་། སྨན་དང་། དཔྱད་དང། ཚེ་བསྲིང་བའི་ཐབས་ལུས་གསོ་བར་བྱེད་པའི་སྐོར་ནི་གསོ་བ་རིག་པར་བལྟའོ། །བརྡའ་གསར་རྙིང་གི་རྣམ་གཞག་ནི་ལེའུ་ཐ་མར་བལྟ་བར་བྱའོ། །

གཞན་ཡང་འདིར་མ་འདུས་པའི་མིང་གི་རྣམ་གྲངས་གཞན་དང་གཞན་ནི་སྔར་གྱི་མཁས་པ་ཚད་ ལྡན་རྣམས་ཀྱིས་མཛད་པའི་དག་ཡིག་ཆེ་ཆུང་སྣ་ཚོགས་འདུག་པ་རྣམས་ལ་ཞིབ་ཏུ་དཔྱད་ ནས་གང་ཟག་ལ་མི་རྟོན་ཆོས་ལ་རྟོན། ཚིག་ལ་མི་རྟོན་དོན་ལ་རྟོན་པའི་སྒོ་ནས་ལེགས་པར་ཤེས་པར་བྱ་ཡི། ཕོ་ཚོད་ཀྱིས་ཟོམ་འཇོག་དང། ཕྱོགས་ཞེན་དང། གཡོ་ཐབས་འབའ་ཞིག་ལྷུར་ལེན་པའི་སྒོ་ནས་རྒྱལ་བསྟན་རིན་པོ་ཆེ་དྲི་མ་ཅན་དུ་ བྱེད་པ་ནི་བློ་གྲོས་དང་ལྡན་པ་རྣམས་ཀྱིས་དུག་བཞིན་དུ་སྤང་བར་བྱའོ། །ཇི་སྐད་བཤད་པའི་ཚུལ་གྱིས་བསམ་པ་དང་སྦྱོར་བ་རྣམ་པར་དག་པའི་སྒོ་ནས། རྒྱལ་བའི་གསུང་རབ་དགོངས་འགྲེལ་དང་བཅས་པ་ལེགས་པར་བསྒྱུར་བ་དང། བསྒྱུར་ཟིན་འཆོས་པ་དང། དེ་ཉིད་ཚུལ་བཞིན་དུ་འཆད་པ་དང། རང་གིས་དོན་ཉམས་སུ་ལེན་ཅིང་གཞན་དག་ཀྱང་ཚུལ་དེ་ལ་སྦྱོར་བ་སོགས་གང་ཡང་རུང་ བའམ། དེ་དག་ཅི་རིགས་པ་ལ་བརྩོན་པས། རྒྱལ་བའི་བསྟན་པ་རིན་པོ་ཆེ་རིང་དུ་གནས་པར་བྱེད་པ་ནི། དལ་བའི་རྟེན་ལ་སྙིང་པོ་ལེན་པའི་ཐབས་མཆོག་ཏུ་གྱུར་པ། སྐྱེས་བུ་དམ་པ་རྣམས་ཀྱིས་གཅིག་ཏུ་བསྔགས་པར་བྱ་བའི་གནས། བདག་ལེགས་སུ་འདོད་པ་རྣམས་ཀྱིས་ནུས་པ་དང་རྩལ་ཅི་ཡོད་ཀྱིས་ཚུལ་དེ་ལ་འབད་པར་ བྱ་རིགས་སོ་ཞེས་ཀུན་ལ་ཐལ་མོ་སྦྱར་ནས་གསོལ་བ་འདེབས་སོ།། །།

 

དྲྭ་ཡིག thumitsang@gmail.com